Курава йышлӑн пуҫтарӑннӑ: Владимир Агеевӑн ячӗ хальхи ӳнерҫӗсем хушшинче сумлӑ вырӑн йышӑнать, хӑйне евӗрлӗхпе, ӑсталӑх шайӗпе яр уйрӑлса тӑрать. Унӑн аллине ыттисеннипе арпаштараймастӑн. Анчах никам та кӗтмен тахҫанах пиҫсе ҫитнӗ 90-ри художник хальхинче пачах ҫӗнӗлле куракан умне тухасса. Ҫак ҫулсенче ҫырнӑ хайлавсенче малтанхи Агеева палласа илетӗнех, ҫапах та вӗсенче урӑх колорит, йӗрсем ҫемҫе те, сывлӑш ҫутӑ: яшлӑхри вӑйпа черчен асамлӑх тепӗр хут таврӑннӑ тейӗн ӳнерҫӗ чун-чӗрине. Чӗнтӗр витӗр пек курӑнакан сийлӗ-сийлӗ ӗмӗлкесенчен, эпир ун ӗҫӗсенче курма хӑнӑхнинчен ачашрах тӗссем урлӑ палласа ҫитнӗ сӑнарсем сӑрхӑнса тухаҫҫӗ: ял пурнӑҫӗ, ҫӑмарта пек чӑмӑр кӳлепеллӗ утсем, хӳхӗм пӳ-силлӗ хӗрсем тата яланах - хӑй.
Марина Карягина, Дмитрий Макаров
