Юрий Матросов ҫавра ҫулӗ тӗлне ятарласа кӑҫалхи ҫулталӑк ҫаврин хӑйне евӗр кӗнекине хатӗрлесе кӑларнӑ. Унта, чӑвашла тата вырӑсла палӑртнӑ кун, уйӑх ячӗсемсӗр пуҫне, художникӑн чӑваш туйӗн йӗркине, ытти йӑласене сӑнарлакан ӳкерчӗкӗсем кӗнӗ. Юбилей куравне Чӑваш халӑх художникӗ "Ӗмӗрсен ҫыхӑнӑвӗ" тесе ят панӑ. Хайлавсенче - Юрий Матросов хӑй мӗн пӗчӗкрен курса-туйса, чунне илсе ӳснӗ самантсем: кӳршӗ-аршӑн кулленхи ӗҫӗ-хӗлӗ, ял ҫыннин пурнӑҫ йӗрки. Ытларах - иртнӗ ӗмӗр сӑнарӗ, ҫавӑнпа картинӑсем паянхи куншӑн та, килес ӑрусемшӗн те уйрӑмах хаклӑ. "Ӗмӗрсен ҫыхӑнӑвӗ" куравпа Кӳкеҫри "Бичурин тата паянхи самана" музейра пуш уйӑхӗн 2-мӗшчен паллашма пулать.
Марина Карягина, Виктор Степанов
