"Салампи" хайлава тепӗр хут лартма хистекенни - авторӗ ҫуралнӑранпа 100 ҫул ҫитнине ҫапла майпа паллӑ тӑвас тени кӑна та мар: повесть пӗрремӗш хут вулакансем патне ҫитнӗренпе - 70 ҫул. Вӑл пӗр ӗмӗр талккӑшӗнче чӑвашла кун ҫути курнӑ мӗнпур произведени хушшинче чи нумай вуланаканни шутланать. Халӑхӑн тӗнчекурӑмӗнче ҫирӗпленнӗ тӗслӗхлӗ хӗрарӑм сӑнарне сӑмахпа ӳкерсе кӑтартма пултарнӑ Александр Артемьевӑн таса юрату хайлавне лартма Наталия Сергеева тахҫанах ӗмӗтленнӗ.
Пластика енӗпе ӗҫлекен режиссёра та театр Пушкӑртстанран чӗнсе илнӗ. Рамиза Мухаметшина хореографи меслечӗсемпе ташӑ урлӑ артистсене хайлавӑн тарӑнӑшне ҫитме пулӑшнӑ.
Спектакле режиссёр ҫӗнӗлле лартнӑ. Куҫса ҫӳрекен декораци сисӗнкӗсӗр улшӑнать: "кашни ҫыннӑн шӑпи - хӑйӗн аллинче" тенӗ пек, тӗрлӗ сценӑна артистсем кураканӑн куҫӗ умӗнче хӑйсемех ылмаштараҫҫӗ. Ҫанталӑк илемне мар, сӑнарсен шалти туйӑмне палӑртса, пас тытнӑ йывӑҫсем черчен те чечен, ҫав вӑхӑтрах - нихҫан ирӗлмесле сивӗ. Светлана Зверева художникпа Питӗртен килнӗ Михаил Добрышин ҫутӑ ӳнерҫин ӗҫне ырламасӑр хӑварма май ҫук. Поэзи чӗлхипе лартнӑ спектаклӗн актуаллӑхне, паллах, ӗмӗрхи хаклӑхсем кӑна мар палӑртаҫҫӗ.
Куракана сӑнарсемпе пӗрле пӑлхантараканни - Лолита Чекушкина композитор ятарласа ҫырнӑ музыка. Салампипе Анатолий Алмазов пӗр-пӗрне вӗрин юратаҫҫӗ, анчах каласа ҫитереймен сӑмах вӗсене пӗрле пулма чарса пырать. Хӗр пуҫпа ача ҫуртӗнчен ывӑл усрама илни, тӗрлӗ элек Салампие юратӑвӗшӗн кӗрешме кансӗрлеҫҫӗ, Анатолий те темшӗн хӑюлӑх ҫитереймест.
Спектакль тепӗр хут юпа уйӑхӗн 3-мӗшӗнче пулӗ. Ӑна Пушкин карттипе те кӗрсе курма пулать.
Марина Карягина, Вадим Владимиров
![](https://px201.medhills.ru/s.gif?mh_id=777c56a4b49d816169e518f01a42b09d&mh_news=Чӑваш академи драма театрӗнче "Салампи" спектакль куракансем умне кӑларчӗҫ&mh_tags=чувашский драмтеатр,премьера,&mh_page=http://chgtrk.ru/novosti/kultura/chavash-akademi-drama-teatrenche-salampi-spektakl-kurakansem-umne-kalarchec/){kind=small}