Упи салинчи стадионта таврари халӑх ирех пуҫтарӑнма тытӑнчӗ. Лапамра шӑранакан юрӑ-кӗвӗ 8 ял ҫыннисемпе пӗрлех, Красноармейскинчи тата тӗп хулари хӑнасене те пуҫтарчӗ. Хӑй вӑхӗтӗнче ял шайӗнче пуҫарса янӑ ҫамрӑксен кунӗ, самай аталанма ӗлкӗрнӗ. Кӑҫалхи уяв программине те анлӑ хатӗрленӗ. Концертпа пӗрлех спортӑн тӗрлӗ енӗпе ӑмӑртусем иртрӗҫ. Ал ӑстисем куракансене хӑйсен ӗҫӗсемпе паллаштарчӗҫ. Ҫавӑн пекех хӑнасем чӑваш апат-ҫимӗҫӗпе сӑйланма пултарчӗҫ.
Уявра хастар яш-кӗрӗмпе нумай ачаллӑ ҫемьесене уйрӑмах тимлӗх уйӑрчӗҫ. Муниципалитет аталанӑвне пысӑк тӳпе хывнӑшӑн вӗсене тав хучӗсемпе чысларӗҫ. Палӑртмалла, Упи тӑрӑхӗнчен сахал мар паллӑ ҫын тухнӑ. Вӗсен йышӗнче - ҫӗр ӗҫченӗсем, пултарулӑх ҫыннисем, спортсменсем. Хальхи вӑхӑтра та ҫитӗнӳ тӑвакансем пур. Дарья Осипова ирӗклӗ майпа кӗрешсе пӗрре мар Раҫҫей шайӗнчи ӑмӑртусенче малти вырӑнсене йышӑннӑ. Ҫак кун ӑна спорт мастерӗн кандидачӗ ята тивӗҫнипе саламларӗҫ. Сӑмах май, ку спорт тӗсӗ Трак енре вӑйлӑ аталаннӑ. Ҫавӑнпа та кӗрешӳ турнирӗ уявра тӗп вырӑнта пулчӗ.
Командӑсем тӗп хуларан, Ҫӗнӗ Шупашкартан, Сӗнтӗрвӑрри, Канаш, Муркаш, Вӑрнар тӑрӑхӗсенчен килнӗ. Хастарсем пӑшалтан тӗл перессинче, кире пуканӗ йӑтассинче, вӗрен туртассинче, ҫемье эстафетинче тупӑшрӗҫ. Ҫавӑн пекех футболла, волейболла вылярӗҫ.
Тӗп тӗллев - ҫамрӑксене ҫуралнӑ тӑрӑхра хӑварасси. Ку ҫивӗч ыйтӑва татса пама промышленноҫ тата ял хуҫалӑх предприятийӗсене аталантарас теҫҫӗ округ тилхепине тытса пыракансем.
Кӑҫал ӑмӑртусен парне фончӗ те пуян пулчӗ. Ҫӗнтерӳҫӗсене уйрӑмшарӑн тата командӑсемпе палӑртрӗҫ, 10-шар пин тенкӗ тата хисеп хучӗсем парса хавхалантарчӗҫ. Ҫитес ҫулхи программа тата та анлӑрах пулмалла. Йӗркелӳҫӗсем мото тата авто чупу ирттерме палӑртаҫҫӗ.
Леонид Петров
