Ача-пӑча пултарулӑхӗн "Жемчужинки Чувашии" фестиваль-конкурсӗ юбилей паллӑ турӗ

Фестиваль хӑнисене Хыркассинчи ача-пӑча ӳнер шкулӗн вӗренекенӗсем кӗтсе илчӗҫ. Чӑваш Ен "ахахӗсемпе" тӗл пулма Александр Шаганов поэт, Юрий Энтин пултарулӑх центрӗн проекчӗсен координаторӗ Татьяна Храпова хаваспах ҫула тухнӑ. Гала-концерт умӗн вӗсем Шупашкар тӑрӑхӗн пуҫлӑхӗпе Владимир Михайловпа тата фестивале пуҫарса, йӗркелесе пыракансемпе курнӑҫрӗҫ. "Жемчужинки Чувашии" конкурсӑн шайӗ пысӑк пулнине палӑртрӗҫ хӑнасем. Унӑн ҫӗнтерӳҫисене Мускаври Юрий Энтин пултарулӑх центрӗнче кашни ҫулах хапӑлласа кӗтеҫҫӗ. Чӑваш Енре унччен те пӗрре мар пулнӑ Александр Шаганов вара чӑваш ачисем пирки талантлӑ та сӑпайлӑ, - терӗ. Хальхинче конкурса хутшӑнакансем поэтӑн "Пултарулӑх мастерскойӗ" проектӗнчи юррисене те шӑрантарчӗҫ. Сӑмах май, кӑҫал фестиваль репертуарӗ нихҫанхинчен пуян. Юрий Энтин сăввисемпе кĕвĕленĕ хайлавсемсӗр пуҫне унта Григорий Гладков, Эдуард Ханок композиторсен юррисене кӗртнӗ. Конкурс йӗрки тӑрӑх ачасен ҫавӑн пекех чӑвашла номер хатӗрлемелле. 

Фестивале тӗрлӗ сӑлтава пула пӗр вӑхӑт ирттермен. Виҫӗ ҫул каялла Хыркассинчи Герман Лебедев ячӗллӗ ача-пӑча ӳнер шкулӗ ӑна тепӗр хут пуҫарса ярас тенӗ. Ку шухӑша Шупашкар округӗн администрацийӗ те, республикӑри хӗрарӑмсен пӗрлешӗвӗ те ырланӑ. 

Конкурсӑн суйлав тапхӑрне кӑҫал 12 муниципалитетри 1200 ытла ача хутшӑннӑ. Жюри вокал, хореографи, музыка номинацисенче пурӗ 400 номере яхӑн хак панӑ. 23-шне гала-концертра курма тӳр килчӗ. 

Ачасене пултарулӑх ҫулне такӑрлатма вӗрентекенсем пулӑшаҫҫӗ. Вӗсене уявра Тав çырăвĕсемпе чысларĕç. Конкурс ҫӗнтерӳҫисене вара парнесемпе дипломсем парса хавхалантарчӗҫ. Фестиваль хӑни Александр Шаганов та саламларӗ вӗсене. Унӑн сӑввисемпе ҫырнӑ юрӑсем халӑхра анлӑ сарӑлнӑ. Вӗсене "Любэ", "Иванушки интернешнл" ушкӑнсем тата ытти паллӑ эстрада юрӑҫисем шӑрантараҫҫӗ. 

Юрий Энтин поэтран та ӑшӑ салам ҫитрӗ. Утӑ уйӑхӗнче вӑл Чӑваш Ен "ахахӗсене" "Чунга-чанга" фестивальте кӗтнине пӗлтерчӗ. Кӑҫал унта кайма Шупашкарти 1-мӗш ӳнер шкулӗнче вӗренекенсем тивӗҫ пулчӗҫ. 

Екатерина Фомина, Екатерина Янгалакова