Тӗлпулура Олег Николаев Раҫҫейӗн строительство министрне Чӑваш Енре наци проекчӗсене пурнӑҫа кӗртес ӗҫ пӗр тикӗс пыни ҫинчен пӗлтерчӗ. "Малтан палӑртса хунӑ плана ҫулталӑк вӗҫлениччен тултараймас хӑрушлӑх ҫук", - терӗ вӑл Ирек Файзуллина. Сӑмахран, "Пурӑнмалли кил-ҫурт" федераци проекчӗпе республикӑра 2 пин сӗм тӑлӑх ачана хваттер памалла. Черет ӳссе ан кайтӑр тесе, регион Пуҫлӑхӗ килес пилӗкҫуллӑхра ҫулсерен ашшӗ-амӑшӗсӗр юлнӑ 450 ачана кил-ҫуртлӑ тӑвасшӑн. Ку йывӑрлӑха федераци пулӑшӑвӗсӗр татса пама май ҫук. Ҫавӑн пекех курнӑҫура хулари ҫурта кӗрекен тата тухакан шыв ыйтӑвне те ҫӗклемелле пулчӗ: Шупашкарта темиҫе насус станцийӗнче техника хатӗрӗсене тӗпрен юсаса ҫӗнетмелле. Ун валли 3 миллиард та 200 миллион тенкӗ хушма укҫа кирлӗ. Кунсӑр пуҫне республикӑра Хӗллехи спорт центрне туса пӗтермелле.
Марина Карягина, Сергей Емельянов
