Вĕсем ĕçре кăна мар, спортра та хастар. Республикăри ял хуçалăхĕнче тăрăшакансен хĕллехи спорт вăййисем иртрĕç. Механизаторсен тупăшăвĕнче Леонид Петров корреспондент пулса курчĕ.
Леонид Петров, Семен Антонов
Республикăри пур хулапа районти спортсменсем тĕп хулари Пăр керменĕнче пухăнчĕç. Чылайăшĕ ку ăмăртăва пĕрремĕш хут мар хутшăнать. Хăшĕ-пĕри Раççей шайĕнчи тупăшусенче те палăрма ĕлкĕрнĕ. Малтанах трактористсем хăйсен ăсталăхне кăтартрĕç.
Кăçал 40 механизатор ăмăртăва хутшăнма кăмăл тунă. Кашни районтан - 2-шер çын. Чи çамрăкки-18-та, асли — 60 çулта. Вĕсен хушшинче 5 хĕрарăм. Вăрнар районĕн чысне хÿтĕлекен Эльвира Чугунова ку вăйăсене ятарлă техникăпа хатĕрленнĕ.
Чылайăшĕ халиччен кун пек тракторпа ĕçлемен терĕç пулин те, çакă ăсталăха кăтартма чăрмантармарĕ.
Хĕллехи ял вăййисен программинче пурĕ 9 дисциплина. Вăл шутра йĕлтĕрпе чупасси, кире пуканĕ йăтасси, ĕне сумалли хатĕре салатса пуçтарасси, эстафета, пăшалтан тĕл пересси тата ытти те. Çĕнтерÿçĕ команда республика чысне Раççейри ăмăртура хÿтĕлĕ. Кăçал вăл пуш уйăхĕн 19-23-мĕшсенче Тюмень тăрăхĕнче иртĕ.
