Йӗпреҫ тӑрӑхӗнче "Чӑваш республикинчи чи лайӑх лесничи" конкурс иртрӗ

Иртнӗ ҫул ҫӗнтерӳҫишӗн Александр Кондратьевшӑн ҫак професси ачаранах ҫывӑх, ашшӗ такӑрлатнӑ вӑрман сукмакӗсем ӑна та илӗртнӗ. Ҫывӑх ҫынни ҫак тытӑмра 30 ҫул ӗҫлесе лесничие ҫитнӗ. Паян Йӗпреҫри вӑрман хуҫалӑхне ертсе пыракан Александр Андреевич 20 ҫулта хӑйӗн тивӗҫне тӗплӗн пурнӑҫлама хӑнӑхса ҫитнӗ. 

Ҫакнашкал тупӑшусем пӗр-пӗрин опычӗпе паллашма, мӗн пӗлнине хӑйнеевӗрлӗ тӗрӗслев витӗр тухса ҫирӗплетме май параҫҫӗ. Хальхи вӑхӑтра вӑрманҫӑ профессине суйлакансем сайра пулнӑ май ҫак ӗҫ пирки тӗплӗнрех пӗлтерни те паха. Лесничисен теори пӗлӗвне, кулленхи ӗҫ хӑнӑхӑвне кӑтартса памалла пулчӗ. 

Теорири 50 ыйтӑва ҫӑмӑллӑнах хуравласа, практикӑри кӑткӑс, тимлӗ пулма хистекен хӑнӑхтарусене кирлӗ пек пурнӑҫласа "Республикӑри чи лайӑх вӑрман инспекторӗ" ята Иван Кадыков тивӗҫрӗ. 20 ҫул ытла Вӑрнар тӑрӑхӗнчи вӑрмансенчи йӗркене асӑрхаса тӑрать вӑл. 

Ҫӗнтерӳҫе кубокпа, дипломпа чысларӗҫ, бензинпа ӗҫлекен пӑчкӑ парнелерӗҫ. 2-мӗш вырӑна Шупашкар тӑрӑхӗнчи вӑрман инспекторӗ Станислав Васильев, 3-мӗшне Канаш вӑрман хуҫалӑхӗн Комсомольскинчи лесничествин лесничийӗ Эдуард Павлов тухрӗҫ. 

Алиса Александрова, Наталья Егорова, Святослав Петров