Хастарсене вырӑнти юрӑ-тӑшӑ ушкӑнӗ хавхалантарчӗ. Савӑк кӑмӑлпа ҫӳп-ҫап пуҫтарма та аванрах. Шывсикки тӑрӑхне тирпей-илем кӗртме чылайӑн хутшӑнчӗҫ: Ильинка шкулӗнче вӗренекенсемпе вырӑнти пуҫлӑхсем. Тӗрӗссипе каласан, субботниксем кунта час-часах йӗркелеҫҫӗ. Ҫӗршыври акци тавралӑха ҫӳп-ҫапран тасатмалли хушма сӑлтав кӑна пулчӗ.
Хастарсем юнашар уҫланкӑна та тирпейлерӗҫ. Туристсем шывсиккипе киленнӗ хыҫҫӑн шӑпах кунта канма юратаҫҫӗ. Вырӑнти маҫтӑрсем сӗтел-пукан та ӑсталаса вырнаҫтарнӑ. Сӑмах май, акци Раҫҫейре 14-мӗш ҫултанпа иртет. Унӑн тӗп тӗллевӗ - халӑха шыв объекчӗсене упрамалли пирки аса илтересси.
Сӑмах май, ҫут ҫанталӑк тасалӑхӗшӗн ҫунакансене ҫитес шӑматкун "Симӗс марафон - Раҫҫей шывӗ" фестивале чӗнеҫҫӗ. Уява экологсемпе «Сбер» пӗрлешӳ йӗркелеҫҫӗ. Савӑнӑҫлӑ ӗҫ-пуҫ Шупашкарти Мускав ҫыранлӑхӗнче иртӗ. Унта чупу пулӗ, ҫавӑн пекех кӑмӑллакансене ҫӳп-ҫапа уйӑрса пухма вӗрентеҫҫӗ.
Вероника Павлова, Михаил Солин
