Пултарулӑх конкурсне 4 ҫултан пуҫласа 18 ҫулчченхи 750 ача хутшӑннӑ. Вӗсем хӑйсен ӗҫӗсенче республикӑри архитектура палӑкӗсене, паллӑ вырӑнсене, Шупашкар портне, Атӑл илемлӗхне сӑнланӑ. Чи кӑсӑкли - ӗҫсене пластик савӑт хупӑлчисенчен ӑсталамалла пулнӑ. Экологи тупӑшӑвне "Чӑваш Ен сӑррисем - 2024" фестиваль шучӗпе республикӑри экологи культурин ҫулталӑкне халалласа йӗркеленӗ. Конкурса хамӑр регионтан, ҫавӑн пекех Мускав, Хусан, Тверь, Питӗр, Самар, Челябинск тата ытти хуласенчен ачасем хутшӑннӑ. Тӳресем чи лайӑх 20 ӗҫ суйласа илнӗ. Пултаруллӑ авторсен йышӗнче Ҫӗрпӳре пурӑнакан 6 ҫулти Максим Леонтьев та. Вӑл пӑрахут ӑсталанӑ. Шупашкарта пурӑнакан Софья Катанова вара пӗрремӗш вырӑн йышӑнчӗ. Ултӑ ҫулти ал ӗҫ ӑсти Анне палӑкне панно евӗр туса кӑтартнӑ. Ҫакӑн валли хӗр ачана икӗ сехет ҫеҫ кирлӗ пулнӑ. Ҫӗнтерӳҫӗсене дипломсемпе асӑнмалӑх парнесем парса хавхалантарчӗҫ тата вӗсене Шупашкар портне экскурсие йыхравларӗҫ.
Оксана Верликова, Елена Михайлова, Вадим Владимиров
