Чӑваш Енри Кадет корпусӗнче пушар сӳнтерчӗҫ, ҫынсене ҫунакан ҫуртран кӑларчӗҫ. Ку вӑл Раҫҫей Чрезвычайлӑ лару-тӑру министерствинче ӗҫлекенсем ирттернӗ вӗренӳ пулчӗ. Тӗплӗнрех - сюжетра.
Екатерина Фомина, Никита Углёв
Пушар машинисем Кадет корпусне васкаҫҫӗ. Унта ҫуртӑн путвалӗнче вут-ҫулӑм тухнӑ. Ҫакнашкал лару-тӑрура кашни минут шутра. Ҫӑлавҫӑсене пӗлтермелле, вӗренекенсене урама кӑлармалла. Телее, Кадет корпусӗнче ҫакна пӗр тӑхтамасӑр тунӑ. Пушарнӑйсем часах ҫитрӗҫ. Васкавлӑ медицина пулӑшӑвӗнче ӗҫлекенсем те сыхӑ тӑчӗҫ.
Хӑшне-пӗрне ҫуртран ҫӑлав маски тӑхӑнтартса илсе тухрӗҫ. Шар курнисен сывлӑхне ҫавӑнтах тухтӑрсем тӗрӗслерӗҫ. Ытларах чухне ҫынсем ҫакнашкал лару-тӑрӑва лексен кам мӗншӗн яваплине манать, хӑраса, пӑлханса каять, - теҫҫӗ ҫӑлавҫӑсем. Кадет корпусӗнче 400 ача вӗренет. Хӑрушсӑрлӑх ыйтӑвӗсене кунта пысӑк тимлӗх уйӑраҫҫӗ. Ҫавӑнпа Чрезвычайлӑ лару-тӑру министерствипе пӗрле ирттернӗ вӗренӳре ҫухалса каймарӗҫ.
Ҫулӑма пушарнӑйсем часах сӳнтерчӗҫ. Раҫҫей Чрезвычайлӑ лару-тӑру министерствин Чӑваш Енри Управленийӗнче палӑртнӑ тӑрӑх, ҫӑлавҫӑсем те, Кадет корпусӗнче ӗҫлекенсем хӑйсен тивӗҫӗсене пӗлсе пурнӑҫларӗҫ.
