Ку ӑмӑрту спортсменсене нумай ҫул пухнӑ ӑсталӑхне туллин кӑтартма пулӑшнӑ. Ҫӗнсе илнӗ медальсен хакне кавир ҫине тухнисем кӑна лайӑх пӗлеҫҫӗ. Ташкентра WKC енӗпе тупӑшу икӗ кун пынӑ. 28 сехете тӑсӑлнӑ ӑмӑртура тӗнчери чи вӑйлӑ каратистсем тӗл пулнӑ. "Жар" спорт комплексӗ 23 ҫӗршыври 2 пин ҫурӑ спортсмена йышӑннӑ.
Тӗнче шайӗнчи ӑмӑртӑва Сурҫӗр Корея спортсменӗсем те хутшӑнма кӑмӑл тунӑ. Хӑнасем ӑсталӑхӗ ҫӳллӗ шайра пулнине ҫирӗплетрӗҫ. Вӗсем 9 медаль выляса илчӗҫ. Чи сумлӑ тупӑшура - кумитэ иппон енӗпе 26 ҫулхи Чонг Вон Бом пьедесталӑн чи ҫӳлти картлашки ҫине хӑпарчӗ.
Раҫҫейӗн пӗрлештернӗ командин те медальсем туллиех. Ҫӗршыв чысне вӑл шутра Чӑваш Енри 23 спортсмен хӳтӗлерӗ. Тӗп хулари 4-мӗш гимназире 8-мӗш класра вӗренекен Екатерина Пикина юниорсен ӑмӑртӑвӗнче ылтӑн, виҫӗ кӗмӗл тата икӗ бронза медаль ҫӗнсе илчӗ.
Узбекистанра иртнӗ чемпионат тата тӗнче Кубокӗ ҫинчен паян 21 сехетре "Россия 24" каналпа тухакан ятарлӑ программӑра тӗплӗнрех каласа кӑтартӑпӑр.
Леонид Петров, Вячеслав Ильин
