Чӑваш патшалӑх педагогика университечӗ акцие кашни ҫулах хастар хутшӑнать. "Чӑваш чӗлхин пӗлтерӗшне, сумне ӳстерессинче эпир хамӑр тивӗҫе те куратпӑр", - теҫҫӗ кунта ӗҫлекенсем. Аслӑ шкул Иван Яковлев ячӗпе хисепленсе тӑрать, чӑваш чӗлхи учителӗсене те ҫакӑнта хатӗрлеҫҫӗ. Диктант ҫыракансен йышӗнче ытларах студентсем пулчӗҫ. Парта хушшине 120-е яхӑн ҫын ларчӗ. Пӗтӗм чӑваш диктантне 2013-мӗш ҫултанпа ирттереҫҫӗ. Халӗ хӑйсен пӗлӗвне тӗрӗслес текенсем унта тӗрлӗ майпа хутшӑнаҫҫӗ. Кӑҫал 7 пин те 200 ытла ҫын чӑваш чӗлхипе диктант ҫырчӗ. Республика тулашӗнче пурӑнакан йӑхташӑмӑрсен хастарлӑхне уйрӑммӑн палӑртмалла. Пушкӑртпа Тутарстан республикисенчи, Чӗмпӗр, Киров облаҫӗсенчи, Ханты-Мансийск, Питӗр, Мускав, Тюмень тӑрӑхӗнчи чӑвашсем хутшӑнчӗҫ ҫак акцие.
Екатерина Фомина, Виктор Степанов
