Константин Москалёв артистӑн чи яваплӑ парти - сцена ҫинче вӑл Федот Васков старшина сӑнарне калӑплать. Персонаж ҫамрӑк мар, ҫапах та вӑл хастар та вӑйлӑ. Спектакльте унӑн ҫарти паттӑрлӑхӗ кӑна мар, ҫынна юратма пӗлни те уҫӑлать. Арҫын вӑрҫӑри хӗрсемшӗн - зенитчицӑсемшӗн - ашшӗ вырӑнне пулать. Хӑюллӑ старшина рольне калӑплама тӑван аслашшӗн сӑнарӗ пулӑшнине пӗлтерчӗ Константин Москалев.
Татьяна Ржевскаян тӳрех 2 роль. Вӑл Елизавета Бричкинана тата унӑн юлташне Людмила Ёлкинана вылять. Хӗрсем пӗр-пӗринчен уйрӑлса тӑраҫҫӗ. Артистӑн кашнин чунне уҫса памалла. Ку опера хӗрарӑмсен хӑюллӑхӗ пирки, тет Даниил Дмитриев режиссер. Черчен хӗрсем тӑван ҫӗршыва хӳтӗлеме тӑраҫҫӗ. Декорацисем те вӑрҫӑ хӗрсен куҫӗпе мӗнле курӑннине кӑтартса параҫҫӗ. "Зори здесь тихие" оперӑна Тӑван ҫӗршывӑн Аслӑ вӑрҫинче ҫӗнтернӗренпе 80 ҫул пулнине халалланӑ.
Постановкӑна культурӑпа искусство облаҫӗнчи Ҫӗршыв президенчӗн Гранчӗ пулӑшнипе лартнӑ. Ӑна Культура.РФ порталта онлайн курма пулать. Пирӗн телерадиокомпани официаллӑ сайтра трансляци йӗркелӗ. Опера фестивалӗ вара 10 кун пырӗ. Чӳк уйӑхӗн 24-мӗшӗнче гала-концертпа вӗҫленет. Унта опера сценин ҫӑлтӑрӗсем, ҫав шута Китайран килнӗ юрӑҫсем те хутшӑнӗҫ.
Надежда Александрова, Дарья Петрова, Вадим Владимиров
