Чӗрӗ сас кӑна, нимӗнле фонограмма та ҫук. Ульяна Самохина пӗр сехет классикӑлла хайлавсем шӑрантарчӗ. Кун пек пысӑк концерт ун пултарулӑх кун-ҫулӗнче пӗрремӗш хут. Вӑл Федор Павлов ячӗлле музыка училищине пӗтернӗ, халӗ Питӗрти Римский-Корсаков ячӗллӗ консерваторинче опера искусствин уйрӑмӗнче вӗренет. Пултаруллӑ хӗр тӑван хулапа ҫыхӑнӑва татмасть. Час-часах килсе ҫӳрет. Концертра пӗрремӗш ретре унӑн вӗрентекенӗсем ларчӗҫ. Вӗсенчен пӗри - Чӑваш халӑх артисчӗ Галина Пуклакова. Концерта музыка училищинче Ульянӑпа пӗрле вӗреннӗ ҫамрӑксем те хутшӑнчӗҫ. Куракансем пурне те хапӑлласа йышӑнчӗҫ.
"Чӑваш патшалӑх ӳнер музейӗ - кӗмӗл ӑрӑва" проектпа килӗшӳллӗн пурӗ 15 концерт лартма палӑртнӑ. 13-шӗ ӑнӑҫлӑ иртсе кайнӑ та ӗнтӗ. Черетлӗ концерт ҫурла уйӑхӗн 17-мӗшӗнче пулӗ. Унта куракансем Павел Никоноров контрабасист пултарулӑхӗпе паллашма пултарӗҫ.
Надежда Александрова, Екатерина Янгалакова
