Фольклориада халӑх тумӗсем тӑхӑннӑ ачасем Шупашкар урамӗсем тӑрӑх утса тухнинчен пуҫланчӗ. 70 ытла регион хӑнисене курма пулчӗ унта: чӑвашсем, вырӑссем, тутарсем, марисемпе удмуртсем тата ыттисем те пӗр колоннӑра пычӗҫ. Вӗсем куракансене тӗрлӗ чӗлхепе саламларӗҫ. Пухӑннисенчен ытларахӑшӗ мӗн пӗчӗкрен халӑх культурине тӗпчет, юрри-ташшине те манмасть. Ҫакӑ вӗсене пӗрлештерет те. Хӗрлӗ Тӳреме пухӑннисене Раҫҫей Президенчӗн Атӑлҫи федераци округӗнчи полномочиллӗ представителӗ Игорь Комаров видеосалам ҫитерчӗ. Фольклориадӑна хутшӑнакансем 3 кун хӑйсен пултарулӑхӗпе куракансене савӑнтарчӗҫ. Ҫамрӑк артистсем Шупашкарта кӑна мар, Ҫӗнӗ Шупашкарта та пулса курчӗҫ. Шӑматкун вӗсемшӗн фестиваль программинчи чи паллӑ самант пулчӗ - вӗсем "Халӑхсен туслӑхӗ" вӑйӑ картине тӑчӗҫ.
Надежда Александрова, Димитрий Макаров, Михаил Солин, Андрей Шоклев
