Ҫӗнӗ Ҫул тӗлне республикӑри пушар хуралӗн тата шыравпа ҫӑлав служби ҫӗнӗ техникӑллӑ пулчӗ. Ятарлӑ машинӑсен уҫҫисене регионӑн тӗрлӗ кӗтесӗнче ӗҫлекенсене пачӗҫ. 3 автоцистерна пушарпа кӗрешекен служба постӗнче хӑйӗн тивӗҫӗсене пурнӑҫлӗ. Вӗсем социаллӑ пӗлтерӗшлӗ объектсенчи хӑрушсӑрлӑхшӑн яваплӑ пулӗҫ. Трак тӑрӑхӗнче вут-ҫулӑма тӗп тӑвассипе ӗҫлекенсем автопарк ҫӗнелсех пынине палӑртаҫҫӗ. 2018-мӗш ҫулта вӗсене 2 "Урал" машина панӑ.
Ҫӗнӗ йышши машинӑсене специалистсем хак пама та ӗлкӗрнӗ. "Пӗр тимӗр ут цистернине 6 тонна таран шыв кӗрет. 2 машинах тахҫанхи темиҫе техникӑна улӑштарма пултарать", - теҫҫӗ Ҫӗнӗ Ҫул умӗн парне йышӑнакансем.
УАЗ машинӑпа та малашне вут-ҫулӑм алхасакан вырӑна хӑвӑрт ҫитме пулӗ. Тӗрлӗ синкер тухсан ҫӑлавҫӑсен ал айӗнче те халӗ ятарлӑ техника ытларах. 4 аварипе ҫӑлав автомобилӗ хуралта сыхӑ тӑрӗ. Уйри кухня та тем пек кирлӗ. Ҫӑлавҫӑсене, чрезвычайлӑ лару-тӑрӑва лекнӗ халӑха вӗри апатпа тивӗҫтерме уйӑрнӑ ӑна. "Инкекре мар, техникӑна вӗренӳ вӑхӑтӗнче кӑна усӑ курма сӑлтавӗ пултӑр", - терӗҫ ҫӑлавҫӑсене машин уҫҫисем панӑ май.
Алиса Александрова, Вадим Владимиров
