РСФСР ҫутӗҫ отличникӗн парнисемшӗн ирттерекен тупӑшу хальхинче унӑн юбилейӗпе пӗр килчӗ. Кӑрлачӑн 10-мӗшӗнче Василий Михайлович 85 ҫул тултарчӗ. Ялти физкультура учителӗн педагогикӑри ӗҫӗ-хӗлӗн кӑтартӑвӗсем курӑмлӑ. Ун патӗнче ӑсталӑхри пӗрремӗш утӑмӗсене Раҫҫей спорт мастерӗ Ирина Калентьева, Иван Калля тата Наталья Шайманова Тӗнче класлӑ спорт мастерӗсем тунӑ. 30 вӗренекенӗ - ҫӗршыв шайӗнче спорт мастерӗ, 55-шӗ - кандидат. Кунтах Раҫҫей тава тивӗҫлӗ тренерӗ Анатолий Николаев та пӗлӳ пухнӑ. Патӑрьел, Каҫал тӑрӑхӗсенчен, Шупашкартан, Йошкар-Оларан килнӗ 7 ушкӑна йышӑннӑ ӑмӑртура Василий Михайлович хисеплӗ хӑна вырӑнӗнче пулчӗ. Чӑваш Ен чемпионӗ - вырӑнти "Лава" спорт клубӗ турнира 2 ушкӑн тӑратнӑ. Волейбол вӑййинче ветерансен тата ҫамрӑксен командисем тупӑшрӗҫ. Финала "Лава" ушкӑнӑн яш-кӗрӗмӗ тухрӗ. Павел Паршин патӗнче ӑсталӑхне туптакансем Мари Элтан килнӗ хӑнасемпе ылтӑншӑн ӑмӑртса ҫӗнтерчӗҫ. Василий Бородкин ҫулӗсене кура мар хӑй те мечӗке ӑстан тыткалать.
Алиса Александрова, Вячеслав Ильин
