2024-мӗш ҫулта ял хуҫалӑхӗ валли бюджетран 5 миллиард тенкӗ ытла уйӑрнӑ. Укҫана тыр-пул, пахча-ҫимӗҫ туса илме, выльӑх-чӗрлӗх ӗрчетме, апат-ҫимӗҫ тирпейлекен промышленноҫа аталантарма панӑ. Чи нумаййи - миллиард та 400 миллион тенкӗ - ҫӗр ӗҫченӗсене йӳнетнӗ кредитпа тивӗҫтерме усӑ курнӑ. Техника паркне ҫӗнетекенсене вара миллиард та 200 миллион тенкӗ валеҫнӗ. Ку пулӑшӑва республикӑра 2020-мӗш ҫулта ҫирӗплетнӗ. Патшалӑх хуҫалӑхсен тӑкакӗсене 45 процент таран саплаштарать.
Ял хуҫалӑхӗнче тӑрӑшакансене пулӑшмалли майсем анлӑ. Пурӗ 78 енӗпе тӗрев кӳреҫҫӗ вӗсене. Выльӑх-чӗрлӗх ӗрчетекенсем патне пӗлтӗр 642 миллион тенкӗ ҫитернӗ, тыр-пул, пахча-ҫимӗҫ туса илекенсем 551 миллион тенке яхӑн тивӗҫнӗ. 68 фермер 2024-мӗш ҫулта грант илнӗ. Пурӗ 394 миллион тенкӗ ытла уйӑрнӑ вӗсене. Чи ыйтаканни - "Агростартап" программа, унпа килӗшӳллӗн паракан укҫана 41 ҫын тивӗҫнӗ. 23-шӗ "Перспектива" грант хуҫи пулса тӑнӑ. Ыттисене ҫемье фермине тата кооператива аталантарма пулӑшнӑ.
Кӑҫалтан икӗ ҫӗнӗ грант вӑя кӗрет. "Агромотиватор" ятлине ятарлӑ ҫар операцине хутшӑнакансемпе ветерансем валли ҫирӗплетнӗ. Ҫакна валли Чӑваш Ен вунӑ миллион ҫурӑ тенкӗ пӑхса хӑварнӑ. "Чӑваш хӑмли" грантпа вара ятарлӑ техника, кирлӗ хатӗрсем туянма май пулӗ.
Ялсене аталантармалли патшалӑх программипе пӗлтӗр 2 миллиард ҫурӑ тенкӗлӗх ӗҫ тунӑ. Ҫав шутра икӗ шкул уҫнӑ. Унсӑр пуҫне укҫана ҫынсен пурӑнмалли майӗсене лайӑхлатма, ялти ипотекӑн ставкине йӳнетме усӑ курнӑ. Халӑх пуҫарӑвӗн программипе уйрӑмах хастар усӑ кураҫҫӗ муниципалитетсем. Пурӗ иртнӗ ҫул пин те 477 проект пурнӑҫа кӗртнӗ. Халӑх пуҫарӑвӗ ҫинче никӗсленнӗ проектсем валли кӑҫал та хыснара укҫа пӑхса хӑварнӑ.
Агропромышленноҫ комплексне аталантарма вара 4 миллиард та 600 миллион тенкӗ уйӑрма палӑртнӑ. Пулӑшу виҫи ҫулталӑк тӑршшӗпе ӳсессе шантараҫҫӗ ял хуҫалӑх министерствинче.
Екатерина Фомина, Виктор Степанов, Святослав Петров
