Ҫӗршыври ӑс-тӑн енчен хавшак ачасене паян 26 спорт тӗсне явӑҫтарнӑ. Спортсменсем ытларах бадминтонпа, ҫӑмӑл атлетикӑпа, ишессипе, тенниспа, пауэрлифитингпа тата ытти вӑйӑсемпе кӑсӑкланаҫҫӗ. Кӑҫалтан республикӑра вӗсем валли тепӗр спорт тӗсне аталантарма йышӑннӑ. Ку вӑл велосипедпа ярӑнасси. Программӑна ятарласа ачасене пур енлӗн аталантарма хатӗрленӗ. Ҫакӑ спортри ӑсталӑха ӳстернипе пӗрлех ҫамрӑксене пурнӑҫра хӑйсен ҫулне тупма пулӑшса пымалла.
Мастер-класа ирттерекенсем пухӑннисене ҫан-ҫурӑма ҫемҫетмелли хусканусемпе паллаштарчӗҫ, унтан тимӗр ут мӗнле пайсенчен тӑнине каласа кӑтартрӗҫ. Ҫавӑн пекех пухӑннисем велосипедпа ярӑнса пӑхма пултарчӗҫ. Ольга Лисицына пӗрремӗш занятие хӑйӗн хӗрне Ксюшӑна илсе килнӗ. Хӗрача самокатпа ярӑнма пӗлет. Ӗҫ кал-кал пырсан вӑл ҫывӑх вӑхӑтра велосипед ҫине куҫасшӑн. Ҫакнашкал мастер-классем малашне те иртӗҫ. Спортсменсем техника теорине вӗренсе ҫитсен, ярӑнма ҫул ҫинче хӑнӑхӗҫ.
Леонид Петров
