Ку шкулта Ҫӗнӗ Ҫул уявӗ пӗрремӗш хут чӑвашла иртнӗрен, ӑна йӗркелекенсем тӗплӗн хатӗрленнӗ. Чӑрӑша та чӑваш эрешӗсемпе илемлетнӗ. Вӑйӑ картине тӑнӑ юмахри сӑнарсем те пурте тӑван чӗлхепе пуплеҫҫӗ. Уяв программи те пӗтӗмпех чӑвашла: сӑввисем те, юррисем те.
Хӗл мучипе Юр пике ирттерекен асамлӑ вӑйӑсенче халӑх йӑли-йӗркине сӑнлама тӑрӑшнӑ. Кунтах юмах-халапсенче тӑтӑшах тӗл пулакан Тухатмӑш та пулчӗ. Ачасем вырӑсла калаҫса ӳснине пӑхмасӑр уява ҫӑмӑллӑнах чӑвашла тытса пычӗҫ.
60-мӗш шкулта ҫак пӗлтерӗшлӗ ӗҫе малалла та аталантарса пырас тӗллевлӗ. Апла пулсан ачасем тӑван халӑх йӑли-йӗркине ӑша хывса ҫитӗнӗҫ.
Леонид Петров
