Республикӑра пушар хуралӗн тата шыравпа ҫӑлав службин пурлӑхпа техника никӗсне пуянлатассине пысӑк тимлӗх уйӑраҫҫӗ. Хальхинче Чӑваш Ене 7 машин кӳрсе килнӗ. Вӑл шутра "Урал" тата "КАМАз" автоцистернӑсем, патруль катерӗ, "Собольпе" "Некст Газель" машинсем. Кӑҫал республикӑра пушар чаҫӗсем ҫумӗнче 3 уйрӑм пост уҫнӑ - Ҫӗрпӳ, Сӗнтӗрвӑрри тата Муркаш тӑрӑхӗсенче. Ҫӗрпӳпе Сӗнтӗрвӑрри округӗнчи постсем Красноармейскинчи 32-мӗш чаҫӗн тимлӗхӗнче.
Машинсен уҫҫисене Чрезвычайлӑ лару-тӑру министерствин Чӑваш Енри тӗп управленийӗн пуҫлӑхӗ Валерий Зеленин тата Чӑваш Енри гражданла хӳтӗлев тата чрезвычайлӑ лару-тӑру ӗҫӗсен министрӗ Сергей Павлов пачӗҫ. Ҫӗнӗ йышши машинсем ҫӑлавҫӑсен пӗтӗмӗшле ӗҫне ырӑ витӗм кӳрессине палӑртрӗҫ.
Диана Сафонова, Игорь Ульянов
