Ку программӑпа килӗшӳллӗн ӗҫсемпе ҫыхӑннӑ тӑкаксен 10 процентне халӑх саплаштарать. Ытти - бюджет укҫин-тенки. Кӑҫал ҫапла майпа вӗренӳ учрежденисен лаптӑкӗсене тирпей-илем кӗртнӗ, чӳречесене, верандӑсене улӑштарнӑ, асфальт сарнӑ тата ытти те.
Шупашкарти 201-мӗш сатикӑн 2-мӗш корпусне 300 ытла ача ҫӳрет. Ку учрежденине 35 ҫул каялла хута янӑ. Унтанпа ӑна пӗрре те тӗплӗ юсаман. "Ниме - халӑх бюджечӗ" программӑна вӗсем пӗрремӗш хут 2 ҫул каялла хутшӑннӑ. Ун чухне садик чӳречисене улӑштарнӑ. Кӑҫал вара 5 ҫӗнӗ веранда вырнаҫтарнӑ. Ҫакӑн валли 4 миллион тенке яхӑн уйӑрнӑ. Ачасен ашшӗ-амӑшӗ те пулӑшнӑ. Верандӑсене ҫуллах улӑштарнӑ. Халӗ ачасем хӑтлӑ майсенче выляма пултараҫҫӗ: юр е ҫумӑр вӗсене хӑратмасть.
166-мӗш ача сатӗнче те ырӑ улшӑнусем — ҫӗнӗ чӳречесем лартнӑ. Халӗ пӳлӗмсенче самай ӑшӑрах. Пурте пӗрле тӑрӑшнипе ҫак ӗҫе тума пултарнӑ. Пурӗ 3 миллион тенкӗ ытла тӑккаланӑ. Пӗр пайне ашшӗ-амӑшӗ саплаштарнӑ. Ашшӗ-амӑшӗ малашне те тӑван сатике пулӑшу кӳме хатӗр. "Ачасене ҫеҫ хӑтлӑ та аван пултӑр", - теҫҫӗ вӗсем.
"Ниме - халӑх бюджечӗ" программӑпа шкул ҫулне ҫитмен ачасен учрежденийӗсем малашне те усӑ курас тӗллевлӗ. 201-мӗш сатикре верандӑсене ҫӗнетсе пӗтерме палӑртаҫҫӗ. 166-мӗш учрежденире те ҫакӑн пирки ӗмӗтленеҫҫӗ.
Оксана Верликова, Святослав Петров
