Чӑваш Енрен Тӑван ҫӗршыва хӳтӗлеме 208 пин ҫын тухса кайнӑ. Вӗсенчен ҫурри вӑрҫӑ хирӗнчех выртса юлнӑ. Тылра та ҫӑмӑл пулман - ватти-вӗтти Ҫӗнтерӗве ҫывхартас тесе хӑйсене шеллемесӗр тӑрӑшнӑ. Фронтран таврӑннӑ ветерансем вара кайран республикӑна ура ҫине тӑратас тесе вӑй хунӑ. "Вилӗмсӗр полк" вӗсене пурне те аса илме май парать. Вӗҫӗмсӗр колоннӑра - пурте пӗр йышри пек. Салтаксем, офицерсем, тыл ветеранӗсем, ватӑсемпе ҫамрӑксем - пурте "Вилӗмсӗр полкра" тивӗҫлӗ вырӑнта. Вӗсемшӗн халӗ тӑванӗсем Ҫӗнтерӳ юррисене шӑрантарчӗҫ, саламсем йышӑнчӗҫ.
Ҫӗнтерӗве ҫывхартнисен паттӑрлӑхне асра тытасси - хальхи ӑрӑвӑн тӗп тивӗҫӗ. Асатте-аттесенчен Тӑван ҫӗршывӑн хальхи тата пулас хӳтӗлевҫисем тӗслӗх илеҫҫӗ.
Надежда Александрова, Михаил Солин
