Шупашкарти шкул ачисем "Стрижи" авиаци ушкӑнӗ патӗнче хӑнара пулчӗҫ

Мускав ҫывӑхӗнчен вӗҫсе килнӗ пысӑк ҫаврӑнӑҫуллӑ истребительсем 4-мӗш хут республикӑра пурӑнакансене Шупашкар кунӗпе саламлама килнӗ. Маларах 2014-мӗш, 15-мӗш тата 19-мӗш ҫулсенче уяв ячӗпе авиашоу ирттернӗ. Пилотсем 2 кунта чылай шкул ачипе тӗл пулчӗҫ. Вӗренӳре, спортра е обществӑлла ӗҫре хастар, ашшӗсем ятарлӑ ҫар операцине хутшӑнакансене ҫапла тимлӗх уйӑрма йышӑннӑ.

Лётчик пулмашкӑн мӗн тумалла, сывлӑх енчен мӗне шута илеҫҫӗ, самолёт мӗнле хӑвӑртлӑхпа вӗҫет тата мӗн ҫӳллӗшне хӑпараять - ачасем хаваспах пилотаж ушкӑн ӗҫӗпе кӑсӑкланчӗҫ. Истребитель ҫине хӑпарса сӑн ӳкерттерни, штурвал умне ларни, турбинӑсене тытса пӑхни - ҫак самантсем нумайлӑха асра юлӗҫ. Пилотаж ушкӑнӗ вӗҫсе килекен кашни хулара ҫавнашкал тӗл пулусене хутшӑнать, ҫитӗнекен ӑрӑва патриотла воспитани парассине хӑй тӳпине хывать.

"Стрижи" - сывлӑш ҫарӗн мӑнаҫлӑхӗ. Истребительсем сехетре 900 ҫухрӑм хӑвӑртлӑхпа вӗҫеҫҫӗ. Кунти кашни пилот ӑсталӑхӗпе палӑрса тӑрать. Аслӑ пилотажӑн чи кӑткӑс фигурисене пурнӑҫлама пултараҫҫӗ. Хӑшне-пӗрне республикӑра пурӑнакансене кӑтартӗҫ. Ҫар истребителӗсен "Стрижи" ушкӑнӗ шӑматкун Шупашкар кӳлемӗшӗ тавра хатӗрленӳ вӗҫевӗ ирттерӗ. Хула кунӗ - ҫурла уйӑхӗн 18-мӗшӗнче - 12 сехетре тӳпене ҫӗкленӗ.

Ирина Николаева, Светлана Позднякова, Андрей Шоклев