Кинематографи регионсенче те хӑвӑрт аталанса пырать. Программӑра - Чӑваш, Тутар, Якут, Удмурт Республикисенче, Новосибирск облаҫӗнче, Краснодар тӑрӑхӗнче ӳкернӗ фильмсем. Ҫапла пирӗн режиссерсен ӗҫӗсене чикӗ леш енчи фильмсемпе танлаштарма кӑсӑклӑ пулнӑ. "Этника тата регионти кино" конкурса кӑҫал 19 картина тӑратнӑ, илемлӗ фильмсем хушшинче вара 9 ӗҫ тупӑшнӑ.
Республика Пуҫлӑхӗн ятарлӑ призне кӑҫал фестивалӗн сумлӑ хӑнине - Раҫҫей патшалӑх кинематографи оркестрӗн тӗп дирижерне Сергей Скрипкӑна пама йышӑннӑ. Вӑл ертсе пыракан оркестр нумай совет тата Раҫҫей фильмӗсене юрӑ-кӗвӗпе илемлетнӗ.
Этника тата регионти фильмсен конкурсӗнче куракансем Иван Кудряшов режиссерӑн "Маскарад" фильмне килештернӗ. Чи ӑнӑҫлӑ режиссурӑшӑн парнене Таджикистанра ӳкернӗ "Унгерния" кӗскӗ метрлӑ фильм тивӗҫрӗ. Конкурсӑн гран-прине Андрей Дуплякинӑн "СН.Г. братан" фильмӗ илчӗ. Илемлӗ киносен конкурсӗнче пӗлтӗртӗнпе ҫӗнӗ номинаци - "Чи лайӑх музыка". Ҫӗнтерӳҫӗсене Эдуард Артемьев парнине параҫҫӗ. Ку наградӑна Виталий Петровӑн "Повесть о светлом человеке" картини тивӗҫрӗ.
"Актерсен чи лайӑх ансамблӗ" диплома Михаил Мерзликинӑн "Шаман" фильмӗ илчӗ. Чи ӑнӑҫлӑ режиссурӑшӑн Иран Республикинче ӳкернӗ "Год кота" фильма палӑртрӗҫ. Кӑҫал пӗрремӗш хут фестивальте тӳресемпе куракансен шухӑшӗсем пӗр пек пулнӑ. Гран-прие тата куракансен парнине "Двое в одной жизни, не считая собаки" картина тата унӑн режиссерӗ Андрей Зайцев тивӗҫрӗ.
Диана Иванова, Наталия Егорова, Виктор Степанов
