Пушар каҫхи сакӑр сехетре тӗп хулари Энгельс урамӗнчи 13-мӗш ҫуртра тухнӑ. Пӳлӗмре виҫӗ ҫулхи тата 11 уйӑхри ачасем пӗччен пулнӑ. Амӑшӗ вӗсене хӑварса лавккана кайнӑ. Телее, вӑл часах таврӑннӑ. Кухньӑри электричество приборӗсене хыпса илнӗ ҫулӑма кӳршисем пулӑшнипе сӳнтернӗ. Сӗрӗм тивнӗ ачасене больницӑна леҫнӗ. Ку ӗҫ-пуҫ кӑрлачӑн 22-мӗшӗнче пулнӑ.
Ҫав каҫах Ҫӗмӗрлери Интернационаллӑ урамра пушар алхаснӑ. Амӑшӗ кухньӑра чухне 4 ҫулти арҫын ача залра шӑрпӑкпа вылянӑ. Ҫулӑм икӗ хутлӑ хваттерти 25 тӑваткал метра ярса илнӗ. Инкеке лекнисене ҫакна асӑрханӑ 32 ҫулти арҫын ҫӑлма васканӑ.
Вӗсене урама илсе тухнӑ. Виҫҫӗшне те медицина пулӑшӑвӗ кирлӗ пулнӑ. Кил хуҫипе ывӑлне Шупашкара больницӑна вырттарнӑ. Чрезвычайлӑ лару-тӑру министерствинче ӗҫлекенсем пушар хӑрушсӑрлӑх йӗркисене асра тытмаллине, ачасене куҫран вӗҫертме юраманнине асӑрхаттараҫҫӗ. Ҫулталӑк пуҫланнӑранпа республикӑра 54 пушар тухнӑ, вӗнче 3 ҫын пурнӑҫӗ татӑлнӑ.
Пулла ҫӳреме кӑмӑллакансен те хӑйсене упрамалла. Юнкун Сӗнтӗрвӑрри ҫывӑхӗнче вӗсем пӑтӑрмаха ҫакланнӑ. Ҫирӗпленсе ҫитеймен Атӑл пӑрӗ катӑлса кайнӑ. Пилӗк пулӑҫ хӑйсем тӗллӗн ҫыран хӗрне тухайман. Вӗсене хӑтарма Ҫӗнӗ Шупашкартан ҫӑлавҫӑсем аэрокимӗпе ҫитнӗ. Пурне те инкекрен ҫӑлнӑ.
Екатерина Фомина
