Чӑваш Енре хамӑра тата кӳршӗ регионсене ҫӗр улмин паха вӑрлӑхӗпе тивӗҫтерме хатӗр

Ку енӗпе селекципе вӑрлӑх центрӗн тӳпи пысӑк. Ӑна Комсомольски тӑрӑхӗнчи "Слава картофелю" агрофирма ушкӑнне кӗрекен хуҫалӑхра уҫнӑ. Предприяти Раҫҫейри Лорх ячӗллӗ тӗпчев  институчӗпе тачӑ ҫыхӑнса ӗҫлет, ҫавна май ҫӗршывра кӑларнӑ ҫӗнӗ сортсем туса илеҫҫӗ.

Ҫӗр улмине кунта пробиркӑра ҫитӗнтереҫҫӗ. Ятарлӑ лабораторинче кӑларнӑ микрокалчасем ҫак теплицӑра вӑй илеҫҫӗ. Кашни ӳсен-тӑран уйрӑм савӑтра аталанать.

Халӗ кунта вӑрлӑхлӑх 25 пин ҫӗр улми ӳстереҫҫӗ. Апрель пуҫламӑшӗнче лартнӑскерсене ҫитес уйӑхра кӑларма та вӑхӑт. Ҫапла теплицӑра ҫулталӑкне 2 хут тухӑҫ илеҫҫӗ - пӗтӗмпе ҫур миллиона яхӑн улма вӑрлӑхӗ ҫитӗнет. Чӑваш Ен Пуҫлӑхӗ кунта пӗрремӗш хут мар, анчах тӗлӗнмелли кашнинчех тупӑнать. Ӑна ҫӗнӗ технологисемпе паллаштарчӗҫ. Унччен калчасене парник евӗр тоннельсенче ӳстернӗ, 3 ҫул каялла хальхи йышши теплицӑна хута ярсан, ӗҫ самаях ҫӑмӑлланнӑ: калчасене пӗтӗмпех тенӗ пек автоматика пӑхса тӑрать.

Хамӑр патӑрти ҫӗр улмин 5 сортне туса илеҫҫӗ кунта. Юлашки вӑхӑтра урӑх ҫӗршывсенчен вӑрлӑх чылай сахалрах кӳрсе килеҫҫӗ. Лорх ячӗллӗ тӗпчев институчӗ паха материалпа тивӗҫтерет. Теплицӑра ҫитӗнтернӗ ҫӗр улми ятарлӑ управӑшра сыхланать - склад 2-3 градусран ытла ӑшӑнмасть, 4 пин тонна ытла пахча-ҫимӗҫ вырнаҫать. Ҫавах та микрокалчаран элитлӑ вӑрлӑх туса илесси 5 ҫул йышӑнать, унтан тин ӑна сутма пуҫлаҫҫӗ. Ӗҫе пурнӑҫлама патшалӑх аванах пулӑшать - субсиди парать.


Ирина Николаева, Вадим Владимиров, Николай Скворцов