Артистсен халӗ кашни кунах репетици пырать. Аякри куракансемпе тӗл пуличчен вӑхӑт нумай та мар. Пултарулӑх ушкӑнӗ "Чӑваш тӗнчи" театрализациленӗ программӑпа ҫула тухать. Сцена ӑстисем юрӑ-ташӑ урлӑ Улӑп паттӑр ҫинчен каласа кӑтартаҫҫӗ. Ку программа - хӑйнеевӗрлӗ спектакль. Кашни номер пӗр-пӗринпе ҫыхӑнса юмах тӗнчине путарать. Сцена ҫине харӑсах хор, балет, халӑх иструменчӗсен оркестрӗ - пурӗ 50 артист тухӗ. Концерт пынӑ вӑхӑтра вӗсем 15 тӗрлӗ ҫи-пуҫ улӑштарӗҫ.
Программӑна ылтӑн фондри хайлавсемпе пӗрлех ҫӗнӗ постановкӑсем те кӗнӗ: "Чӑваш Ен - Атӑл чӗри" сюита, вырӑсла тата чӑвашла юрӑсенчен йӗркеленӗ хор произведенийӗсем тата ыттисем те. Раҫҫейре халӑхсен пӗрлӗхӗн ҫулталӑкӗ пулнӑ май, тӗрлӗ наци ҫыннисен юрри-ташши те пысӑк вырӑн йышӑнать концертра.
Ансамблӗн илемлӗх ертӳҫи Алексей Тимошенко палӑртнӑ тӑрӑх, пултарулӑх ушкӑнӗ ҫамрӑксемпе пуянланнӑ. Балетра тата хорта 25 ытла ҫӗнӗ артист. Пысӑк гастроле "Эпир - Раҫҫей" федераци программипе килӗшӳллӗн йӗркелеҫҫӗ. Пӗр ӗмӗр урлӑ каҫнӑ ансамбль концертсен ярӑмне Чӗмпӗр хулинче пуҫлать те, Хусанта вӗҫлет.
Диана Сафонова, Игорь Ульянов








