Хӗл пуҫлансан ӑшӑпа вӗри шывшӑн коммуналлӑ тытӑмри пулӑшу ӗҫӗсенчен пуринчен ытла тӳлеме тивет. Квитанцири кӑтартусем уйӑхран уйӑха улшӑнӑҫҫӗ: урамра мӗн чухлӗ сивӗрех, ҫуртсене ӑшӑтма ҫавӑн чухлӗ хӑват нумайрах кирлӗ. Унсӑр пуҫне малашне тӳлевсене ҫӗнӗ тарифпа шутлама пуҫлаҫҫӗ.
Палӑртса хӑваратӑп, коммуналлӑ тӳлевсене нумай пулмасть ҫеҫ - ҫулла пӑхса тухнӑ. Ун чухне ӑшӑ тарифӗ 6% ӳснӗ. Раштав уйӑхӗнчен Шупашкарта пурӑнакансен хваттерти вӗри батарейсемшӗн тата ытларах тӑккаланмалла пулӗ. Хаксем 11% ытларах ӳсеҫҫӗ. Ҫӗнӗ Шупашкарта та ӑшӑ тарифӗ ҫавӑн чухлех улшӑнма пултарать. Коммуналлӑ тӳлевсене хаклатасси инфляципе ҫыхӑннӑ, ӑнлантараҫҫӗ правительствӑра. Ӑшӑшӑн самай нумайрах тӳлеме тивет пулсан та, коммуналлӑ ҫӑмӑллӑхсем пӗтӗмӗшле 9 процентран ытлашши ӳсмеҫҫӗ, палӑртаҫҫӗ тарифсен службинче.
Ирина Николаева, Вадим Владимиров
