Чӑваш Енре "Ачалӑх ячӗпе, ачалӑхшӑн" марафон вӗҫленчӗ

Ӑна Шупашкарти "Малютка" ача ҫуртӗнче пӗтӗмлетрӗҫ. Паян кунта тин ҫуралнӑ пепкесенчен пуҫласа 5 ҫула ҫитичченхи 40 ача пурӑнать. Ҫуртра вӗсене валли мӗн кирли пӗтӗмпех пур.

Алексей Енейкин, Екатерина Янгалакова

Специалистсем пӗчӗкскерсене амӑшӗн ӑшшине пама, тӗрлӗ енлӗн аталанса ӳсме пулӑшаҫҫӗ. Ача ҫуртӗнчи лару-тӑрупа Республика Пуҫлӑхӗн администрацийӗн ертӳҫи Юрий Васильев тата Сывлӑх сыхлавӗн министрӗ Владимир Викторов паллашрӗҫ. Ашшӗ-амӑш хӳтлӗхӗсӗр юлнисене патшалӑх яланах пысӑк тимлӗх уйӑрнӑ.

"Ачалӑх ячӗпе, ачалӑхшӑн" марафон чӑвашсен ниме йӑли евӗр 1996-мӗш ҫултанпа иртет. Предприятисемпе организацисем, уйрӑм ҫынсем йывӑр лару-тӑрӑва лекнӗ е сусӑр ачасене пулӑшма укҫа-тенкӗ пухаҫҫӗ. "3-мӗш Стройтрест" пӗрлешӳ директорӗ Валерий Семенов, сӑмахран, акцие хутшӑнса кӑҫал 100 пин тенкӗ панӑ. Ырӑ ӗҫшӗн вӑл "Ачалӑх меценачӗ" медале тивӗҫрӗ. Ун пек ҫынсем халӗ нумайланса пынине палӑртмалла.
Акци вӑхӑтӗнче пухӑннӑ укҫапа ача-пӑча вылямалли лаптӑксем уҫаҫҫӗ, сывлӑха ҫирӗплетмелли хатӗрсем туянаҫҫӗ.

Фонд хӑйне валли пӗр пус та тытса юлмасть. Кашни район-хулана хӑйсем пухнӑ укҫине ырӑ ӗҫ валли тавӑрса парать.