Вӑхӑтсӑр пурнӑҫран уйрӑлнӑ республикӑн спорт министрӗ пулнӑ Сергей Шелтукова асӑнса Шупашкарта йывӑр атлетика енӗпе республика чемпионачӗ иртрӗ. Унта чи вӑйлӑ спорстменсем хутшӑнчӗҫ.
Надежда Александрова, Вячеслав Ильин, Семен Антонов
Чемпионата 50 ытла спортсмен хутшӑнчӗ. Вӗсенчен 17-шӗ - Чӑваш Ен чемпионӗсем пулса тӑчӗҫ. Хӑйсен вӑйне тӗрӗслес текенсен йышӗнче Новосибирскра иртнӗ Раҫҫей чемпионатӗнче палӑрнисем те пулчӗҫ. Ҫӗршывӑн пӗрлештернӗ ушкӑнӗнчи спортсменсем хутшӑнни ӑнсӑртран мар. Республика федерацийӗн историйӗнче пӗрремӗш хут Чӑваш Ен чемпионачӗн наградисемпе пӗрлех ҫӗнтерӳҫӗсем Сергей Шелтукова асӑнса ирттерекен республика турнирӗн медалӗсене те тивӗҫрӗҫ.
Пӗлтӗр авӑн уйӑхӗнче йывӑр чир Чӑваш Енӗн физкультура тата спортӑн тава тивӗҫлӗ ӗҫченӗн Сергей Шелтуковӑн пурнӑҫне вӑхӑтсӑр татрӗ. Вӑл спорт аталанӑвӗнче, уйрӑмах йывӑр атлетикӑра тарӑн йӗр хӑварма пултарчӗ.
Ӑмӑрту Александра Козловашӑн, Яна Мохинашӑн, Ирина Баймулкинашӑн тата Наталья Шаймановашӑн ҫӗнтерӳпе вӗҫленчӗ. Вӗсем пурте Раҫҫей тава тивӗҫлӗ тренерӗ Геннадий Иванов патӗнче пултарулӑхне туптаҫҫӗ. Сергей Шелтуковӑн ентешӗсем те - Елчӗкри спорт шкулӗнче вӗренекенсем те хӑйсене лайӑх енчен кӑтартрӗҫ. 55 кило виҫе категорийӗнче Анатолий Иноходов Чӑваш Ен чемпионӗ пулчӗ.
