Елчĕк районĕнчи Лащ Таяпара республикăн тава тивĕçлĕ тренерĕ пулнă Пётр Самсонова асăнса йăлана кĕнĕ çăмăл атлетика турнирĕ иртрĕ. Ăмăртăвăн тĕллевĕсем пирки Алексей Енейкин каласа кăтартать.
лексей Енейкин, Александр Воронин
Лащтаяпасем пур ĕçре те хастар. Çитĕнекен ăрăва хăюллă та тарават пулма вĕрентеççĕ. Кашни çулах район тата республика шайĕнче темиçе ăмăрту йĕркелеççĕ. Нумайăшĕ - ялтан тухнă паллă çынсене сума суса. Пётр Самсонова халалланă чемпионат кăçалхипе 8-мĕш хут Елчĕкпе Патăрьел тăрăхĕнчи пĕтĕмĕшле тата вăтам пĕлӳ паракан шкулсенче вĕренекенсене пухрĕ. Вăхăтĕнче çăмăл атлетика енĕпе темиçе хут та республика чемпионĕ пулнă спортсмен çамрăксемшĕн ырă тĕслĕх.
Пётр Самсонов ăста тренер пулнă. Унăн вĕренекенĕсем тăтăшах район тата республика шайĕнчи ăмăртусенче мала тухнă. Çак ялтах çуралса ӳснĕ Владимир Андреев, сăмахран, олимп вăййисенче палăрнă.
Çăмăл атлетикăна аталантарас тата шкул ачисем хушшинче пулас спортсменсене палăртас тĕллевпе йĕркеленĕ чупу хĕрӳ иртрĕ.
Тĕрлĕ ӳсĕмри хĕрсемпе каччăсем харпăр хăй мала тухассишĕн тата шкул ушкăнĕсемшĕн ăмăртрĕç. Кунта пĕрремĕшсем патреккелсем пулчĕç. Çĕнтерӳçĕсене яланхиллех парнесемпе, медаль-грамотăсемпе тата кубокпа чысларĕç.
Ял уявĕпе пĕр вăхăтра пулакан турнир чаплă концертпа вĕçленчĕ. Каçпа вара Лащ Таяпа çийĕн салют ялкăшрĕ.
