Канаш районĕнчи Çĕнĕ Шелттемре СССР спорт мастерĕ, Раççей Федерацийĕн физкультурăн тава тивĕçлĕ ĕçченĕ, Чăваш Республикин физкультура тата спорт министрĕ пулнă Вячеслав Краснов ячĕпе хăвăрт утакансен республикăри ăмăртăвĕ иртрĕ.
Владимир Тимофеев, Иван Макеев
Ку турнира 19-мĕш хут йĕркеленĕ. Унччен вăл Вячеслав Краснов парнисемшĕн пулнă, юлашки виçĕ çулта вара - ăна асăнса. Тупăшу кашни çулах çамрăк спортсменсене тата сумлă атлетсене пуçтарать. Хальхинче те пухăннисене тĕнче тата Европа чемпионĕсем, Олимп вăййисене хутшăннисем тата призерĕсем Алина Иванова, Владимир Андреев, Олимпиада Иванова, тĕнче Кубокĕн çĕнтерÿçи Александра Деверинская саламларĕç, мастер-класс кăтартрĕç. Старта пурĕ республикăри 300 ытла çамрăк тухрĕ. Вĕсем пĕр тата виçĕ çухрăмлă дистанцисенче тупăшрĕç. Çĕнтерÿçĕсене уйрăммăн тата ушкăнпа палăртрĕç. Командăсенчен канашсем чи вăйлисем пулчĕç. Хăйсен ушкăнĕсенче пĕрремĕш вырăн Вăтапуç тата Шелттем шкулĕсенче вĕренекенсем йышăнчĕç.
Старта, яланхи пекех, ял çыннисем те тухрĕç. Ку ушкăнра палăрнисене вара дипломпа медальсĕр пуçне пĕр михĕ тырă парса хавхалантарчĕç.
