Ăна çĕршыври тата республикăри самбо федерацийĕсен ертӳçисене асăнса йĕркеленĕ. Вĕсен пурнăçĕ авиакатастрофăна пула вăхăтсăр татăлнă.
Надежда Александрова, Вячеслав Ильин
Ку инкек 10 çул каялла Пермь çывăхĕнче пулнă. Самолет ÿкнипе пурнăçран уйрăлнă 88 пассажир йышĕнче Пĕтĕм Раççейри самбо федерацийĕн попечительсен канашĕн пайташĕ Геннадий Трошев генерал-полковник, пĕрлешÿн пĕрремĕш вице-президенчĕ Владимир Погодин тата Чăваш Патшалăх канашĕн депутачĕ, самбо енĕпе тĕнче класлă спорт мастерĕ Александр Трофимов пулнă. Пĕтĕм Раççей шайĕнчи ăмăрту - вĕсен мухтавлă ĕçĕсене аса илни.
Турнир спортсменсемшĕн те пĕлтерĕшлĕ. Кашни виçе категорийĕнче палăрнисем Раççей ăмăртăвĕн финалне хутшăнма ирĕк çĕнсе илчĕç. Чăваш ЕН спортсменĕсенчен пьедесталăн чи çӳлти картлашки çине пĕрремĕш Даниил Данилов хăпарчĕ. Унпа кĕрешекен Пушкăртстанри Эмиль Аглиуллин 2 çул аслăрах пулин те, Даниил çĕнтерĕве алăран вĕçертмерĕ.
Чăваш Енри самбо шкулĕн чысне Павел Иванов та ăнăçлă хÿтĕлерĕ. Вăл 52 кило виçе категорийĕнче мала тухрĕ.
Пирĕн ушкăншăн виççĕмĕш «ылтăна» Юрий Пушкин çĕнсе илчĕ. Чăваш Енĕн пĕрлештернĕ командин пурĕ 3 „ылтăн“, икĕ „кĕмĕл“ тата 9 „бронза“.
Раççей финалне хальлĕхе путевка илеймен самбистсен раштав уйăхĕнче тепĕр шанăç пулĕ. Ун чухне Атăл федераци окургĕнчи ăмăрту иртĕ.
