Раççейри чи паллă ӳнерçĕсене çак кунсенче кӳлемĕш таврашĕнче курма пулать.
Алексей Енейкин, Виктор Степанов
Çĕршывĕпех палăрнă 19 ӳнерçĕ Чăваш Енĕн тĕп хулине тĕрлĕ енчен ӳкереççĕ. 11-ĕшĕ урăх регионтан çитнĕ. Сăрă ăстисем ирхи 6 сехетрех кӳлемĕш патĕнче пуçтарăнаççĕ. Унтан кашни хăйне килĕшекен композици суйласа илет те ĕçе пикенет. Хăшĕ-пĕри кун каçа темиçе картина ÿкерме ĕлкĕрет. Кӳлемĕш çывăхĕнче кирек ăçта вырнаçсан та хула тĕлĕнмелле илемлĕ курăнать, теççĕ художниксем. Йĕри-тавра чиркӳ-мăнастир, авалхи архитектурăллă çуртсем. Çакă тыткăнлать те вĕсене. Хусантан килнĕ Мударис Мингазов çак 3 кунта чăвашла калаçма та вĕреннĕ. Ятлă-сумлă ăстасен пултарулăхĕпе паллашас тĕллевпе пленэра Шупашкарти ӳнер шкулĕсенче вĕренекенсем те хутшăнаççĕ. Ӳнер ăсталăхне ăша хывакансене йĕпе - сапа та та шиклентермест. Фестивале ятарласа хула кунĕ умĕн ирттерме шутланă. Ӳнерçĕсем кунта тунă чи лайăх ĕçĕсене Шупашкара парнелесе хăвараççĕ. Килес çул вара – хула 550 çул тултарнă тĕле кунтах халăхсен хушшинчи пленэр йĕркелеме палăртаççĕ. Ӳнерçĕсен чи илемлĕ картинисемпе ятарлă куравра паллашма май пулĕ.