Чăваш Енре çичĕ пин ытла çын алимент тӳлемеççĕ. Ачисене çитĕнтерме пулăшманнисен йышĕнче хĕрарăм та нумай. Çакăн пек ашшĕ-амăшне явап тыттарнипе пĕрлех ÿкĕте те кĕртме тăрăшаççĕ.
Елена Дмитриева, Лидия Галактионова, Виктор Степанов, Игорь Ульянов
Статистика тăрăх, алимент тӳлеменнисен йышĕнче, тĕпрен илсен, 30-тан пуçласа 42 çула çитичченхи арçынсем. Вĕсем хуласенче пурăнаççĕ, официаллă ниçта та ĕçлемеççĕ. Парăмçăран алимента ĕç укçинчен тытса юлма пултараççĕ е ĕçлеттерсе явап тыттараççĕ.
Парăмçăсем палăксене тирпейлеççĕ, урамсене тасатаççĕ, саксене сăрлаççĕ, тĕмсене касаççĕ, курăк çулаççĕ, юхăннă çуртсене пăсаççĕ. Ленин районĕнче кунне вăтамран 5 çын урамсене тирпейлеме тухать. Çав вăхăтрах çакăн евĕр ĕç алимент тÿлессинчен хăтармасть. Тивĕçе пурнăçламан ашшĕ-амăшне 10-15 кунлăха ирĕкрен хăтарма пултараççĕ.
Пуçтарăннисенчен ытларахăшĕ камерăран сăнне пытарма тăрăшрĕ, калаçăва хутшăнмарĕ. Василий Атте пухăннисемпе сехет ытла пуплерĕ. Тен, çакăн хыççăн парăмçăсем ачисем умĕнчи айăпне туйса илĕç. Явапсăр ашшĕ-амăшĕпе çакăн пек тĕл пулусем малашне те ирттерме палăртнă.