Мĕн пĕчĕкрен ачасене амăшĕ юратса ÿстерет, ача сатĕнче те вĕсене пăхакансем яланхи пекех - хĕр арăмсем. Ачана çитĕнтерме ашшĕ те ытларах хутшăнтăр тесе Шупашкарти 185-мĕш ача сатĕнче ĕçлекенсем «Аттесен урокĕсем» ятлă проект пуçарнă.
Анастасия Кудряшова, Ирина Ромадова, Павел Иритков
Ачашăн ашшĕпе пĕрле выляни, вĕренни, тем те пĕр ăсталани, сăн-ÿкерчĕксем туни – кашни пулăм пысăк пĕлтерĕшлĕ, малашнехи пурнăçра та вăл уншăн тĕслĕх пулма пултарать.
Ачан пĕрремĕш вĕрентекенĕсем – ашшĕпе амăшĕ. Вĕсем урлă пепке тĕнчене курать, пĕлĕвне аталантарать. Сатик те ача-пăча аталанăвĕнче паллă йĕр хăварать. Çавăнпа воспитани ĕçне пĕрле туса пырас тени пархатарлă ĕç. «Аттесен урокĕсем» проектпа килĕшÿллĕн хальхинче сатикре ĕçлекенсем «Çемье уявĕ» йĕркеленĕ. Унта ашшĕ-амăшне йыхравланă, вĕсем кунта вăхăта ачисемпе пĕрле ирттереççĕ. Çатма икерчи пĕçереççĕ, шахмăтла выляççĕ, тĕрлĕ шăкăр-макăртан çуртсем купалаççĕ.
«Аттесен урокĕсем» питĕ кăмăллă иртеççĕ. Ачасем вĕсене хăнăхнă, кашнинчех мĕн те пулин çĕнни пуласса пĕлсе чăтăмсăррăн кĕтеççĕ.
