Чи нумай çын Вăрнар, Елчĕк, Элĕк, Улатăр, Красноармейски, Шăмăршă, Тăвай тăрăхĕсенче сасăланă. Вĕсенче суйлавçăсен 90 ытла проценчĕ хăйсен тивĕçне пурнăçланă. Пирĕн пултарулăх ушкăнĕ Шупашкар тата Сĕнтĕрвăрри районĕсене çитсе курчĕ.
Леонид Петров, Виктор Степанов
Тутаркассинчи суйлав лаптăкĕсенче ĕç вĕресе тăчĕ. Ял тăрăхĕнче сасăлав харăсах 4 вырăнта иртрĕ. Вăтам шкулта уйрăмах çын йышлă пулчĕ. Çĕршыв пуласлăхне палăртма нумайăшĕ çемйипех килнĕ. Суйлав йĕркине тĕрлĕ парти, Чăваш Республикин обществăлла палатăн хастарĕсем асăрхаса тăчĕç.
Шуршăлта та сасăлав лăпкă иртрĕ. Кунта пурăнакансен ытларах пайĕ суйлава кăнтăрлачченех килнĕ. Вĕсен йышĕнче пĕлтерĕшлĕ пулăма пĕрремĕш хут хутшăнакансем те пулчĕç. Çамрăксене асăнмалăх парнесем пачĕç.
Çавăн пекех Шуршăлта пропискăра тăман 29 çын сасăлама кăмăл тунă. Ку тăрăхра пурăнакан 54 çын вара хăйĕн конституци правипе урăх вырăнта усă курасси пирки пĕлтернĕ. Пĕтĕмпе шуршăлсен 91 проценчĕ сасăлава хутшăннă.
Хăнасем валли Космонавтика музейĕнче экскурси йĕркелерĕç. Çавăн пекех Андриян Николаевăн юратнă апачĕпе – шÿрпепе сăйларĕç.
