Шупашкар районĕнче çитес çулсенче хальхи йышши хăтлă теплицăсем хута каймалла. Вĕсенче 500 яхăн çĕнĕ ĕç вырăнĕ тума палăртнă. Проект пурнăçа кĕрсен Чăваш Ен çулсерен хушма 19 пин тонна хăяр-помидор туса илме пуçлĕ.
Алексей Енейкин, Никита Углев
Республикăра кун йышши инвестици проекчĕ халиччен нихçан та пурнăçланман. Çĕнĕ Шупашкар çывăхĕнчи Тутаркасси ял тăрăхĕнче 22 гектар çинче хĕлĕн-çăвĕн пахча-çимĕç ӳстерме шутлаççĕ.
Çак пысăк объекта Чăваш Енре пурнăçа кĕртес тĕлĕшпе республика ертӳçи Михаил Игнатьев «Ренова» компанисен директорĕсен канашĕн председателĕпе Виктор Вексельбергпа Японире тĕл пулса калаçнă. Проект хакĕ 6 миллиард тенкĕ. Строительсем палăртнă вырăнта ĕçе пикенсен, Котеркассинче тата çывăхри ытти ялсенче пурăнакан хăш-пĕр çынсем хăйсене кунтан куçараççĕ тесе пăшăрханса ӳкнĕ. Çĕр пайĕсене тытса илĕç текен сăмах та тухнă.
Теплицăсен проектне экспертиза тунă. Ĕçсене тума паянхи куна 125 миллион тенкĕ тăккаланă. Хальлĕхе кунта 6 çын вăй хурать. Строительствăн пĕрремĕш тапхăрне çитес çул вĕçлеме палăртнă. 2021 çул тĕлне теплицăри кашни тăваткал метр пуçне 65-70 кило помидор, 150 кило хăяр туса илĕç. Пĕтĕмпе кунта 500 яхăн ĕç вырăнĕ тăваççĕ.