21 ноября 2017 16:36   1°   $59.27 €69.67

08.11.2017 18:55

Шупашкарта пĕтĕм чăвашсен 3-мĕш «Асам» кинофестивальне хатĕрленеççĕ

Конкурсра кăçал мĕнле фильмсем пулаççĕ тата куракансене  мĕн çĕнни кĕтет? Кун пирки йĕркелÿçĕсем пресс-конференцире каласа кăтартрĕç.

Алексей Енейкин, Игорь Ульянов 

«Асам» фестивале кино ăсталăхĕнчи пултаруллă маçтăрсене палăртас тĕллевпе республикăн культура министерствипе кинематографистсен пĕрлешĕвĕ тата «Чăваш наци конгресĕ» йĕркелеççĕ. Вăл чӳк уйăхĕн 13-мĕшĕнче Çеçпĕл Мишши ячĕллĕ çамрăксен театрĕнче уçăлать. 5 кун пырать.

«Асам» кинофестивальте тĕрлĕ жанрпа ӳкернĕ фильмсем пулĕç. Вĕсене тӳресем 14 номинацире хаклĕç.

Фестивалĕн тĕп тĕллевĕсенчен пĕри ― чăваш халăхĕ валли тăван чĕлхепе тивĕçлĕ фильмсем хатĕрлесси. Çак ĕç хальлĕхе йывăррăн пурнăçланса пынине палăртмалла. Республикăра уйрăм студисемпе тĕрлĕ пултарулăх ушкăнĕ ытларах чухне вырăсла фильмсем кăна ӳкереççĕ. Çавах та ку çивĕч ыйтупа халĕ «Чăвашкино» студийĕ çанă тавăрсах ĕçлет.

Чăвашлăх тата чăвашсем çинчен ӳкернĕ фильмсем тăван халăх аталанăвĕнче сумлă вырăн йышăнасса шанаççĕ уява йĕркелекенсем. Вĕсене уйрăм номинацире пахалĕç. Конкурсри чи лайăх кино вара яланхи пекех фестивалĕн гран-прине тивĕçĕ. Фильмсемпе çитес эрнере Наци библиотекинче, «Чăвашкино» Патшалăх киностудийĕпе электронлă документсен архивĕнче тата çамрăксен театрĕнче тӳлевсĕрех паллашма пулĕ.