Шупашкарти Андриян Николаев ячĕллĕ паркра «Ача-пăча Акатуйĕ» фестиваль-конкурс иртрĕ. Кăçалхипе ăна 4-мĕш хут йĕркелерĕç. Ачасем ташларĕç, юрларĕç тата тĕрлĕ вăйăра тупăшрĕç.
Надежда Александрова, Александр Яковлев
Чăн та, уяв программине çумăр улшăнусем кĕртрĕ. Апла пулин те ачасене вăл хăратмарĕ. Акатуя Шупашкарпа Çĕнĕ Шупашкар хулисенчен çеç мар, Шупашкарпа Елчĕк районĕсенчен те хăнасем килсе çитрĕç. Уяв сцени çинче чăваш юрри-ташшине кăтартрĕç.
- Эпĕ çак уява питĕ кĕтрĕм, çумăр çăвать пулин те кăмăл пăсăлмарĕ, - тет Елчĕк районĕнчи Аслă Елчĕк шкулĕнче вĕренекен Маша Адюкова.
Ташăçсемпе юрăçсем пултарулăх конкурсĕнче тупăшнă вăхăтра теприсем спортра вăй виçрĕç. Арçын ачасем, сăмахран, пиçиххисемпе кĕрешрĕç. Кашниех хăйĕн шкул чысне тивĕçлĕ хӳтĕлерĕ. Кунтах «автансен» вăййи иртрĕ. Хĕрлĕ-сарă тĕслĕ тум тăхăнса пĕр ура çинче сикме ачасене çăмăл пулмарĕ. Çавăн пекех уявра ӳкерчĕксен конкурсне те пĕтĕмлетрĕç.
