Шупашкарти ĕç тата вĕренÿ учрежденисен коллективĕсем çуркуннехи пĕрремĕш субботнике тухрĕç. Константин Иванов ячĕллĕ сквера тасатма вĕсене артистсемпе юмахри сăнарсем пулăшрĕç.
Оксана Баскакова, Михаил Солин
Экологи акцийĕ савăнăçлă лару-тăрура иртрĕ. Йĕркелӳçĕсем артистсемпе юрăçсене чĕннĕ. Вĕсем субботнике хутшăнакансене хавхалантарса тăчĕç.
- «Таса Шупашкар» акци иртет. Эпир Çамрăксен правительствинчи хастарсем сквера тасатма килтĕмĕр, - тет Анастасия Иванова студент.
Субботнике 200 ытла çын хутшăнчĕ. Сехетре пĕр машин çÿп-çап пуçтарчĕç. Хастарсен шухăшĕпе, халăха тирпейе хăнăхтармалла. Унсăрăн сквер каллех тасамарлăхпа тулса ларĕ.
- Эпĕ хулана юратнăран субботнике тухрăм, - тет чăваш халăх артисчĕ Августа Уляндина.
Пĕтĕм хулари субботнике вара шăмат кун ирттерме палăртнă. Çанталăк ăшă пулсан, пурне те Çĕнтерӳ паркне йыхравлаççĕ.