Газшӑн хулара та, ялта та пӗр пек хак ҫирӗплетнӗ. "Кӑвак ҫулӑмӑн" кубла метрӗ Ҫӗнӗ Ҫултан 8 тенкӗ те 30 пус пулать. Юпа уйӑхӗнчен вара унӑн хакӗ 9 тенкӗ те 11 пуспа танлашӗ. Киловатт электроэнергишӗн хулара пурӑнакансен ялтисенчен ытларах кӑларса хума тивӗ.
Ӑпӑр-тапӑр турттарса тухассишӗн республикӑра пӗр оператор яваплӑ. Чӑваш Республикин ҫут ҫанталӑк ресурсӗсен министрӗ Эмир Бедертдинов пӗлтернӗ тӑрӑх, ҫак пулӑшу ӗҫӗшӗн хаксем юпа уйӑхӗн 1-мӗшӗнчен ҫеҫ ӳсӗҫ. Хваттерте пурӑнакансен пӗр ҫын пуҫне 139 тенкӗ те 55 пус, уйрӑм ҫуртсенче пурӑнакансен 149 тенкӗ те 85 пус тӳлемелле пулать. Кӑҫалхи чӳк уйӑхӗнче Канаш тӑрӑхӗнче ӑпӑр-тапӑр тирпейлекен комплекс хута янӑ. Унта йӑла каяшне юнашарти виҫӗ округран турттараҫҫӗ.
Ҫав хушӑрах ҫемье коммуналлӑ тӳлевсемшӗн мӗн пур тупӑшран 22 процент е ытларах тӳлет пулсан субсиди тивӗҫме пултарать. Унчченхи пекех хӑшпӗр ушкӑнри граждансем валли ҫӑмӑллӑхсем пӑхса хунӑ. Кӑҫалхи 11 уйӑхра вӗсемпе республикӑри 275 пин ҫын усӑ курнӑ. Вӗсен тӳлевӗсене 1 миллиард та 710 миллион тенкӗлӗх саплаштарнӑ.
Оксана Верликова, Святослав Петров
